Tuesday, May 3, 2011

अल्पसंख्यक समाजा मधील मार्क्सवादी कम्युनिस्ट पक्षाच्या कामाचा आराखडा

अल्पसंख्यक समाजा मधील मार्क्सवादी कम्युनिस्ट पक्षाच्या कामाचा आराखडा

मार्क्सवादी कम्युनिस्ट पक्षाच्या राज्य स्तरीय अल्पसंख्यक सबकमिटीने प्रस्तावित केलेला आराखडा सखोल चर्चेअंती मंजूर करण्यात आला. त्यातील महत्वाचे मुद्दे -

1. राज्य स्तरीय सबकमिटीप्रमाणे ज्या ठिकाणी अल्पसंख्यक समाजात काम, संपर्क अथवा नोंद घेण्यासारखी सभासद संख्या आहे अश्या सर्व जिल्ह्यांमध्ये जिल्हा स्तरीय सब कमिटीचे गठन करून प्रत्यक्ष कामकाज सुरु केले जाईल. पुढील जिल्ह्यांमध्ये ह्या कामाची सुरुवात केली जाईल- मुंबई, ठाणे, नाशिक, सोलापूर व मराठवाड्यातील सर्व जिल्हे.

2. केंद्र शासनाने अल्प संख्यक समाजासाठी मल्टी सेक्टोरियल डेव्हलपमेंट कार्यक्रमामध्ये महाराष्ट्रातील 3 जिल्ह्यांचे नाव निर्देशित केले आहे- हिंगोली, वाशिम आणि बुलढाणा. ह्या तिन्ही जिल्ह्यातील पक्ष सभासदांना हा कार्यक्रम राबवण्याच्या कामात सक्रीय केले जाईल.

3. अल्प संख्यक समाजातील इतर मागासवर्गीय (ओ. बी. सी.) समाज बांधवांना त्या त्या प्रकारचे दाखले मिळवून देण्यासाठी स्थानिक पक्ष शाखांना सक्रीय केले जाईल.

4. मौलाना आझाद विकास महामंडळाची सर्वंकष माहिती घेऊन त्याआधारे अल्प संख्यक विभागाला शैक्षणिक शिष्यवृत्ती, घरांसाठी कर्ज, नुकसान झाल्यास आर्थिक सहाय्य मिळवून देण्या बाबतीत पक्ष सभासदांनी पुढाकार घ्यावा. शासकीय योजनांबाबत अल्प संख्यक समाजात जागृती करण्यासाठी सतत संपर्कात राहिले पाहिजे.

5. वक्फ बोर्डाकडे मुस्लिम समाजाच्या जमिनी मोठ्या प्रमाणात आहेत परंतु त्या जमिनींच्या बाबतीत फार मोठे गैर व्यवहार होत आहेत. अल्प संख्यक समाजामध्ये त्याबाबत जागृती करून तसेच शासनावर दबाव आणून या जमिनींचा वापर अल्प संख्यक समाजासाठी शैक्षणिक संस्था, रुग्णालये, स्मशानभूमी तसेच समाजातील दुर्बल घटकांसाठी गृहनिर्माण योजना, आश्रमशाळा आदी समाजोपयोगी कामासाठीच करण्याची मागणी पक्षाच्या वतीने केली जाईल.

6. महाराष्ट्रात अल्प संख्यक मुस्लिम समाजाची लोकसंख्या 14 टक्के आहे मात्र निरनिराळ्या कारणासाठी तुरुंगात असलेल्यांचे प्रमाण 40 टक्के आहे. यात निरपराधांचे प्रमाण फार मोठे आहे. जे निरपराध लोक तुरुंगात खितपत पडले आहेत व पोलीस ज्यांच्यावरील गुन्हा सिध्द करु शकलेले नाहीत अश्या तरुणांना संयुक्त महाराष्ट्राच्या सुवर्ण महोत्सवी वर्षात मुक्त करण्याची मागणी पक्षाच्या वतीने केली जाईल.

7. संघटित कामगार व स्वयं रोजगार या क्षेत्रांमध्ये अल्प संख्यक समाजाचे प्रमाण फार मोठे आहे. या विभागांकडे पक्षातर्फे खास लक्ष देऊन या विभागांमध्ये प्रभावी संघटना उभी करण्यावर लक्ष केंद्रित केले जाईल.

8. देशाचा स्वातंत्र्य लढा, संयुक्त महराष्ट्र, गोवा मुक्ती आदी लढ्यांमध्ये अल्प संख्यक समाजाचे योगदान फार मोठे आहे. यात पक्षाला मानणाऱ्यांचीही संख्या मोठी आहे. अश्या व्यक्तिमत्वांचा परिचय जीवनमार्ग या पक्ष मुखपत्रातून देण्यात येईल. उदा. मुझफ्फर अहमद, अश्फाक उल्ला खान, हसरत मोहानी इत्यादी.

9. सर्व शिक्षा अभियान व एकात्मिक बाल विकास सेवायोजना या मार्फत अल्प संख्यक समाजातील बालकांसाठी चालविल्या जाणाऱ्या शाळा, अंगणवाड्यांचे प्रमाण फार कमी आहे. ह्यात उर्दू शिक्षकांचे प्रमाण नगण्य आहे. उर्दू माध्यमाच्या शाळांमधे शिकलेल्या शिक्षकांची भरती करणे, लोकसंख्येनुसार उर्दू शाळांची संख्या वाढवणे बाबत शासनाकडे पाठपुरावा केला जाईल. ह्यातून शिक्षणाबरोबरच रोजगारही उपलब्ध होईल.

10. अल्प संख्यक समाजातील प्रगतीशील विचारांच्या विचारवंत व लेखकांशी पक्षातर्फे संबंध प्रस्थापित करण्याचा प्रयत्न केला जाईल. त्यांचे प्रगतीशील विचारांचे हिंदी व उर्दूतील लेख प्रसिद्धी माध्यमातून सतत अल्प संख्यक समाजामध्ये प्रसारित करण्याचा प्रयत्न केला जाईल.

11. या वर्षी शासनाने भरती पूर्व प्रशिक्षण देऊन 500 मुस्लिम तरुणांची पोलीस खात्यात भरती केली. याप्रमाणे राज्य व केंद्र शासन, महानगर पालिका, रेल्वे तसेच इतर विभागात भरती पूर्व प्रशिक्षण देऊन अल्प संख्यक समाजातील तरुणांना स्वाभिमानाने जगण्याची संधी देण्याची मागणी पक्षातर्फे शासनाकडे करण्यात येईल.

12. अल्प संख्यक समाजाबाबत पक्षाने केलेले कार्य, पक्षाची अल्प संख्यक समाजाबाबतची भूमिका, तसेच सच्चर व रंगनाथ मिश्रा कमिटी अहवाल, त्याविषयावरील पक्षाचे मत व पक्षाने सुरु केलेले काम याबाबत माहिती देण्यासाठी अल्प संख्यक समाजातील 200 ते 300 कार्यकर्त्यांसाठी राज्य स्तरीय शिबीर घेण्यात येईल.

13. पक्षाच्या विविध स्तरावरील नेतृत्वाने अल्प संख्यक समाजातील लोकांशी सतत संपर्कात राहून, त्यांच्या अडी अडचणींबाबत चर्चा करून त्या सविस्तर समजावून घ्याव्या व त्यांच्याशी संबंध वाढवावेत.

14. अल्प संख्यक समाजामधून कार्यकर्ते व नेते तयार करण्यासाठी विशेष प्रयत्न केले जातील.

No comments:

Post a Comment